Ukrayina TİN Rusiye mahkemesiniñ Ukrayina vatandaşları Servet Gaziyev, Cemil Gafarov, Alim Karimov, Seĭran Murtaza ve Erfan Osmanovğa çıqarğan ükümlerni takbih etti ve ayıp adlandırdı.
"Qırımtatarlarnıñ episi qanunsız sürette 13 yıl apis cezasına mahküm etildi. Ukrayina vatandaşları Rusiye quvetçileri tarafından 2019 senesi mart ayında muvaqqat işğal etilgen Qırımda kütleviy tintüvler vaqtında siyasiy motivli qabaatlavlarnen tevqif etildiler. Olar meşur "Hizb ut-Tahrir" davasında yaqalanğan 25 kişiden soñ beşidir. "Mahkeme davası"nıñ uzun müddet baqılması vaqtında Rusiye tarafı siyasiy mabüslerge qarşı insaniyetsiz muamele kösterdi ve kerekli tibbiy yardım yapmadı. Hususan 2-nci gruppa saqatı Cemil Gafarov ve 61 yaşındaki yervet Gaziyev", - dep yazıla beyanatta.
Ukrayina TİN qayd ete ki, "sözde Rusiye adliyesi defalarca "mahkemelengenlerniñ" usul uquqlarını bozğan - mahkeme oturışlarında qırımttaar tilinde sözge çıqmağa yasaq etken ve soñki söz aqqından marum etken".
Yanvarniñ 11-nde Rostov-na-Donudaki (Rusiye) Cenübiy bölgeniñ arbiy mahkemesi "Qırım musulmanları davası"nıñ mabüsleri Servet Gaziyev, Cemil Gafarov, Alim Karimov, Seĭran Murtaza ve Erfan Osmanovğa üküm çıqardı. Bunı "Qırım birdemligi" cemaat birleşmesi haber etti. Reislik yapqan mahkemeci Valeriy Opanasenko suçlanğanlarnıñ episini RF Ceza qanunnamesiniñ 205.5 maddesiniñ 2-nci qısmına binaen (Terrorristik teşkilâtnıñ faaliyetinde iştirak etüv) qabaatlı tanıdı ve er birini 13 yıl apis cezasına mahküm etti. Bundan ğayrı er kes içün azat etilgen soñ 1 yıl, Servet Gaziyev ve Alim Kerimov içün ise 1 yıl 6 ay müddetine areket azatlığınıñ sıñırlanması tayin etildi.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
