Ukrayina TİN amerikalı milliarder İlon Masknıñ Rusiye tarafından işğal etilgen Qırım ile bağlı yazğanlarına cevap berdi.
"İlon Masknıñ Qırım ile bağlı yazğanlarınıñ tarihiy manası olıp olmağanı aqqında tartışqanlar içün bir qırımtatar olaraq şunı aytmama izin beriñiz: Qırımnıñ Rusiyege ait olğan narrativini qabul etmek yañlıştır. Asırlar devamında Rusiye, evimizni elimizden alınmaması içün küreşkenimiz içün tamır qırımtatar halqını öldürip keldi", - dep yazdı Twitter saifesinde Ukrayina TİN yolbaşçısınıñ birinci muavini Emine Ceppar.
Bundan ğayrı Ceppar, Rusiye "qırımtatarlarğa qarşı soyqırım yapqanını ve Qırımnıñ etnik terkibini deñiştirgenini" dedi.
"Topraq ve adamlarğa ğanimet kibi yanaşmaq ne derecede ahlâqiydir? Bu munasebet terrornı ve insanlıqqa qarşı cinayetlerni qanuniyleştirmek ıntıluvdır", dep bildirdi o.
Evel amerikalı iş adamı İlon Mask Qırım meselesine dair fikrini bildirdi. O, Qırımda referendum keçirip, onıñ aytqanı kibi "Hruşçovnıñ hatasını" tüzetmek ve şu statusta yarımadanı suv ile temin etmek teklif etti.
Oktâbrniñ 17-nde Mask, ilhaq etilgen Qırımnı ğayıp etmek telükesi peyda olsa, Rusiyeniñ özek silâsını qullanmağa azır olacağına inanğanını bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
