Qırımnıñ ğarbındaki Kezlev aviasiya zavodına darbe endirildi, dep bildirdi Ukrayina telükesizlik hızmeti. Mütenasip haber Oraqnıñ 31-nde müessiseniñ içtimaiy ağlardaki saifelerinde derc etildi.
"Vaqtınca işğal etilgen Kezlevde aviasiya tehnikasınıñ saqlanuvı içün eki angar ve Kezlev aviasiya zavodınıñ istisal tsehine urdılar", — dep aytıla haberde.
Ücüm ne vaqıt yapılğanı aqqında idarede bildirmediler. Bu beyanatnıñ tasdıqı yoq.
Öz nevbetinde, Ukrayina Silâlı quvetleriniñ Baş ştabı Qırımnıñ Saq rayonındaki Naumovka meskün yeri yanında silâ anbarına ücüm etilgeni aqqında esabat berdi. Ukrayina komandanlığı bir de bir tasdıqlama bermedi.
Rusiye arbiyleri bu malümatnı izaatlamadı, tek Oraqnıñ 31-nde saba Rusiye Mudafaa nazirligine Rusiye Federatsiyasınıñ 10 regionı ve işğal etilgen Qırım ve Qara ve Azaq deñizleri üzerinde 371 dron tüşürilgenini bildirdiler. Uçaqlarnıñ qaçı urıp tüşürilgeni aqqında aytılmadı. Müessise, zarar körgenler ya da ğayıp olğanlar aqqında haber etmedi.
2022 senesi Armandan başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.