Ukrayina telükesizlik hızmetiniñ dronları keçken afta Donetsk vilâyetinde Rusiye silâ anbarını yoq etti, dep bildirdi Azatlıq Radiosına SBU-daki haberdar menba, açıq izaat bermege ruhsetsiz olğanı içün adını bildirmek istemedi.
"SBU keçken künü keçirgen mahsus operatsiyanıñ tafsilâtları peyda oldı. Telükesizlik hızmetiniñ dronları Donetsk vilâyetiniñ vaqtınca işğal etilgen territoriyasında Markino köyü yanında artileriya ve mina anbarlarında "pamuqlar" yaptı. Anda biñlernen arbiy tehnika, tank, tanka qarşı idare etilgen raketa, mina, granata ve farqlı kalibrli millionlarnen patron bar edi", — dep bildirdiler SBU-da.
Ukraina mahsus hızmetiniñ malümatına köre, mahsus operatsiya neticesinde obyektte bütün gece patlavlar oldı. "Tek silâ anbarı degil de, yanındaki yanıcı malzemeler anbarı da yoq etildi", — deyler SBU-da.
Mariupol şeer yolbaşçısınıñ mesleatçısı Petro Andreşçenko, işğal etilgen Markino köyünde dekabr 12-ne keçken gecesi patlavlar yüz bergenini bildirgen edi. Onıñ aytqanına köre, patlav ve çırpınuvnı bir qaç saat devamında közetkenler, lâkin onıñ sesi Rusiyeniñ Taganrog şeerinden 40 kilometr uzaqlıqta eşitile edi.
Rusiyeniñ Ukrayinağa tam miqyaslı istilâsı başlağan soñ, Rusiye regionları ve Ukrayinanıñ Rusiye tarafından işğal etilgen topraqları muntazam sürette ateşke ve uçucısız uçaqlarnıñ ücümlerine oğray.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
