Ukrayina telükesizlik hızmeti Kıyivde ve vilâyette arbiy tehnikanıñ, blokpostlarnıñ, müim infraterkip obyektleriniñ, vatandaş ve arbiy obyektlerniñ bulunğan yeri aqqında malümat toplağan 60 yaşındaki Ukrayina vatandaşınıñ yaqalanılması aqqında haber ete.
Müessiseniñ matbuat hızmeti telegram kanalında haber etkeni kibi, qadın RF-daki yetekçilerinden vazifeler alıp, programmalar ve mesencerler vastasınen olarğa arbiy obyektlerniñ fotoresimlerini ve bulunuv yeri aqqında malümat yollay edi.
"İlk malümatqa köre, duşman bu malümatnı raketa darbelerini endirmek ve Kıyivge diversiyalar yapmaq içün qullanmağa planlaştıra edi", - dep haber ettiler telükesizlik hızmetinde.
Qadın Ukrayina ceza qanunnamesiniñ 111 maddesiniñ 2-nci qısmına binaen qabaatlana (devlet hainligi). Tahqiqat devam ete.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
