Rusiyedeki Tataristanda 16 millionlıq Shahed darbe dronlarınıñ parçalar anbarı yoq etildi, dep bildirdi Ukrayina Mudafaa nazirliginiñ Baş istihbarat idaresi.
Haberge köre, anbar «yıqıcı yanğın» neticesinde «Alabuga» iqtisadiy alanında yoq etildi.
«Anda 400 Shahed-136 yapmaq içün ücüm dronlarınıñ 65 füzelâjı, motorlar, navigatsiya sistemaları, teplovizion videokameralar bar edi – episi yandı», – dep aytıla haberde.
Baş istihbarat idaresi Rusiye anbarınıñ yoq etilüvinden kelgen zararnı 16 million dollar olaraq esapladı.
Qırım.Aqiqatnıñ muarrirleri bu malümatnı mustaqil menbalardan tasdıqlap olamay.
Dekabrniñ 21-nde Rusiye akimiyeti Tataristannıñ Qazan şeerine ücüm aqqında bildirdi. Rusiye tarafı sekiz uçucısız «kelişi» aqqında haber etti, olarnıñ arasında birisi sanayı müessisesine, altısı mesken yerge ücüm etti.
Rusiyeniñ Ukrayinağa qarşı büyük ücümi başlanğanından berli Rusiye regionları muntazam sürette ateş ve dronlarnıñ ücümlerine oğray. Rusiye Mudafaa nazirligi Rusiyede tüşürilgen raketa ve dronlar aqqında haber ete. Kyiv ekseriyette bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
