Ukrayina Suriye ile diplomatik munasebetlerni yañıdan başlatmağa azırlana, dep bildirdi yanvarniñ 2-nde Ukrayina prezidenti Volodımır Zelenskıy.
Bu aqta o, Ukrayina Tış işler naziri Andriy Sıbiğa ve köy hocalığı siyaseti ve aşayt malları naziri Vitaliy Kovalniñ Suriye ve Lübnandaki muzakereleri aqqında maruzasıdan soñ ayttı.
«Bu sene işana bilgen ortaqlarımızğa, hususan Suriyege daa çoq memleketni qoşa bilemiz. Biz Suriye ile diplomatik munasebetlerni ve halqara teşkilâtlarda özara tesirni ğayrıdan başlatmağa azırlanamız. Bu bağlarnıñ havfsızlığı içün esasnı teminlegenleri içün istihbaratımızğa teşekkür bildirmege isteyim. Ziyaretniñ neticesinde biz Lübnannen de ticaretni arttıracaqmız: şimdi bu memleketnen tek köy hocalığı ihracatında 400 million dollar bar, ve biz onı iç olmağanda eki qat arttırmağa azırlanamız. 2025 senesi Afrikanen işte de daa çoq faaliyet olacaq, ve er bir böyle yañı ortaqlıq bizim diplomatiyamız içün büyük imkânlar ve iqtisadiyatımız içün büyük imkânlar ifade ete», – dedi Zelenskıy.
Prezidentniñ aytqanına köre, o, Tış işler nazirine Afrika memleketlerinen bazı añlaşmalar azırlamaqnı emir etti. Zelenskıy bu añlaşmalar aqqında tafsilâtlı malümat bermedi.
Dekabrniñ 23-nde Ukrayina prezidenti Volodımır Zelenskıy Ukrayina Tış işler nazirligine yañı Suriye akimiyetinen bağlarnı inkişaf etmekni emir etti, dep haber etti. O, Ukrayina Suriyede aşayt telükesizligini destekleycegini qoştı ve Ukrayina BMniñ Dünya aşayt programmasınen işbirliginde bizim «Ukrayinadan boğday» gumanitar programmamıznıñ bir qısmı olaraq Suriyege 500 tonna boğday unu yollağanını ayttı.
Dekabrniñ 30-nda Ukrayina Tış işler naziri Andriy Sıbiğa Suriyege bardı.
Ukrayina 2022 senesi iyün ayında Dimaşq Donetsk ve Lugansk vilâyetlerindeki işğal etilgen topraqlarnıñ «mustaqilligini» tanımaq qararını qabul etken soñ konsullıq munasebetlerini bozmayıp, Suriyenen diplomatik munasebetlerini bozdı.
Dekabrniñ başında Suriyede prezident Başar Asadnıñ rejimi devrildi ve akimiyet «Hayat Tahrir aş-Şam» islâmcı teşkilâtı yolbaşçılıq yapqan isyancı küçlerge keçti. 50 yıldan ziyade Suriyeni sultanlıq şeklinde idare etken Asad ve onıñ qorantası Rusiyege qaçmağa mecbur oldılar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
