Ukrayina istihbaratı işğal etilgen Qırımda Rusiye uçaqları ve radiolokatsion stantsiyalarnı yoq etti, dep bildirdi. Bu haber Ukrayina Mudafaa nazirligi Baş istihbarat idaresiniñ Telegram kanalında derc etildi.
Beyanatta «Prizraki» mahsus bölükleri eki An-26 naqliyat uçağı, radiolokatsion stantsiyanı ve «Mıs M1» MR-10My yalı radiolokatsion stantsiyasını yoq etti, dep aytıla.
Rusiye tarafı tehnika zarar körgenini tasdıqlamağan edi.
Sentâbrniñ 23-nde Ukrayina Silâlı quvetleri Baş ştabı işğal etilgen Qırımda «Kaça» uçaq alanına darbe endirdi, dep bildirdi. Müessise Rusiyeniñ eki uçağına darbe yapılğanını tasdıqlağan edi.
Sentâbrniñ 22-nde aqşam Qırım Telegram kanalları uçucısızlarnıñ Aqyar ücümi aqqında yazdı. Şeerniñ Rusiye yolbaşçısı Mihail Razvojayevniñ aytqanına köre, altı dron şeerge yaqınlaşqanda tüşürildi, daa bir danesi – Kaça civarlarında. Anda ot yandı, dep aytıldı.
Kaça qasabasında Rusiye Qara deñiz flotuna ait Rusiye arbiy uçaq alanı bar. Anda 318-inci ayrı qarışıq aviatsiya polku yerleşe. Bölükniñ An-26, Be-12 uçaqları ve Ka-27 vertolötları bar.