Rusiyeniñ Belgorod şeerinde ve onıñ civarındaki meskün yerlerde kiçik aynıñ 4-ne keçken gecesi Ukrayina tarafından yapılğan raketa ücüminden soñ elektrik teminlevi qısmen kesildi. Belgorod vilâyetiniñ gubernatorı Vyaçeslav Gladkovnıñ bildirgenine köre, infrastrukturanıñ obyektlerinden biri zarar kördi, amma zarar körgenler yoq.
"Pepel" neşriniñ malümatına köre, eki elektrostansiya "Frunzenskaya" ve "Belgorod" zarar körgen.
Vilâyet suv kanalından haber etkenlerine köre, raketa darbesinden soñ suv anbarlarınıñ elektrik teminlevi kesilgen.
"Pepel" şunı da yaza ki, arbiy silâlı quvetlerniñ ücüminden soñ Belgorodnıñ mesken evlerinde qızdıruv teminatı kesilgen, şeerde ava arareti ise 20 derece. Yerli sakinler suv ve internet kesilüvi aqqında bildireler.
Kiçik aynıñ 3-ne keçken gecesi Rusiye ordusı Ukrayinağa kütleviy bir darbe endirdi. Ukrayina akimiyetiniñ malümatına köre, ücümniñ esas maqsadı kritik infrastruktura, şu cümleden energetika obyektleri oldı. Bundan soñ Ukrayina prezidenti Volodımır Zelenskıy, Rusiye dört kün devam etken energetik barışıqnı bozdı, dep bildirdi.
Kıyivde bir qaç aftadan berli biñden ziyade ev yarıqsız ve qızdıruvsız. İnsanlar mahsus qızdıruv noqtalarında qızdırılmağa mecburlar.