Ukrayina SQ AD quvetleri Orta küzniñ 15-ne keçer gece Rusiye Federatsiyasınıñ Voronej vilâyetindeki Borisoglebsk arbiy uçaq alanına "Neptun" yalı boyu raketalar sistemasından urğanını bildirdi.
Ukrayina ADQ-nıñ malümatına köre, ücüm vaqtında rusiyeniñ altı Su-34M qırıcısı zarar körgen.
Orta küzniñ 15-ne keçer gecesi Rusiyeniñ Voronej vilâyetiniñ Borisoglebsk şeerindeki arbiy uçaq alanına ücüm etildi. Bu aqta Ukrayin Telegram monitoring kanalları Supernova+ ve Exilenova+ haber ettiler. Olarnıñ malümatlarına köre, ücümler "Tomahavk" raketalarnen yapılğan.
Voronej vilâyetiniñ valisi Aleksandr Gusev ücümniñ regionğa tesiri aqqında daa haber etmedi. Yarı geceden soñ o, dronlarnıñ havfı aqqında bir qaç bildirüv yaptı.
Rusiyeniñ Râzan vilâyetiniñ başı Pavel Malkov regionğa dronlarnıñ büyük ücümi yapılğanı aqqında haber etti. "Havfsızlıq masqadınen" Râzannıñ Oktâbrskiy ve Sovet rayonlarınıñ bir qısmındaki mekteplerde ve bala bağçalarında dersler lâğu etildi.
Rusiyeniñ Mudafaa nazirligi bir qaç region şu cümleden Voronej ve Râzan üzerinde 166 Ukrayin dronunıñ zararsızlaştırılğanı aqqında haber ete.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.