Ukrayina silâlı quvetleriniñ Baş ştabı çeçek ayınıñ 6-nda gece Ukrayina quvetleri Rusiyeniñ Novorossiysk şeerinde "Şesharis" neft terminalını ve işğal etilgen Qırımda "Be-12" amfibiya uçağını urdı, dep yazdı.
Rusiye Federatsiyasınıñ Krasnodar ülkesinde neft terminalına ücüm aqqında aytsaq, Ukrayin komandanlığınıñ malümatına köre, "terminal territoriyasında büyük yanğın qayd etildi, lâkin zarar mıqyası daa belli degil".
"Bundan ğayrı, Qırım Muhtar Cumhuriyetiniñ Qaçı rayonında Be-12 deñizaltı qırıcı amfibiya uçağınıñ yoq etilüvi tasdıqlandı. Zarar körgenlerniñ sayısı belli degil", — dep qoştı komandanlıq.
Daa evel ASTRA rus telegram kanalı Novorossiyskte Rusiyeniñ eñ büyük ve strategik emiyetli terminallarından biri olğan "Şesharis" terminalına dronlar ücüm etti, dep yazğan edi.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti "Ukrayina uçucısızlarına" qarşı atış, "ava mudafaasınıñ işi" ve Rusiye arbiyleriniñ "talimleri" dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.