Ukrayina Silâlı quvetleriniñ Baş ştabında bildirdiler ki, Quralaynıñ 28-ne keçer gecesi Kefe rayonında "ST-68" Rusiye radar stansiyasına ücüm etildi. Buña ait haber nazirlikniñ içtimaiy ağlardaki saifelerinde derc etildi.
"Ava obyektlerini tapmaq içün qullanılğan "ST-68" radar stansiyası zararlandı. RLS "ST-68", duşmannıñ ava mudafaası sistemasında ava nişanlarınıñ koordinatlarını tapmaq, taqip etmek ve bermek içün qullanıla", — dep aytıla haberde .
Rusiye arbiyleri bu haberni izaatlamadı ve zarar körgenleri aqqında bildirmediler.
Bir kün evelsi Qırım ve Aqyarda gece ve saba patlav ve atışlar eşitildi, gece yarısından soñ pilotsız telüke ilân etildi, dep bildirilgen edi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.