Rusiye arbiyleri Oraqnıñ 7-sine keçer gecesi Ukrayinağa Rusiye Federatsiyasınıñ territoriyasından ve işğal etilgen Donetsk ve işğal etilgen Qırımnıñ Çauda burnundan uçurılğan 123 arbiy uçucısız uçaqnen ücüm etti, dep bildirdi Ukrayina Arbiy-ava quvetleri.
İlk malümatqa köre, saat 08:30-ta ava mudafaası tarafından 108 duşman dronnı, şu cümleden "Şahed", "Gerbera", "İtalmas" ve diger tiplerdeki dronlar memleketniñ şimalinde, cenübinde, merkezinde ve şarqında tüşürildi, dep aytıla haberde.
Ukrayina Silâlı quvetleriniñ Ava quvetleriniñ malümatına köre, 10 yerde 12 ücüm uçağı uruldı, beş yerde ise uçaq parçaları tüşti.
Rusiye arbiyleri ücümni daa izaatlamadı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.