Ukrayina Silâlı quvetleriniñ Baş ştabında İlk küzniñ 30-na keçer gecesi Qırımnıñ Aq Şeyh rayonınıñ Kumovo köyünde RF ordusınıñ maddiy-tehnikiy vastalar anbarına ücüm etilgeni aqqında esabat berildi. Mütenasip haber, müessiseniñ içtimaiy ağlardaki saifelerinde derc etildi.
"Donetsk vilâyetiniñ Aovske, Manguş, Novoandrayivka ve Volnovaha ve Qırımdaki Kumovo şeerinde maddiy-tehnikiy vastalarnıñ anbarları zarar kördi. Rusiye işğalcileriniñ esas arbiy nişanları boyunca iş devam ete", — dep aytıla haberde.
Bundan ğayrı, Ukrayina Silâlı quvetleriniñ Baş ştabında bildirilgeni kibi, Donetsk vilâyetinde Rusiye ordusınıñ dron anbarına darbe endirildi, ve Lisiçanskta komandanlıq-nezaret noqtası ve Lugansk vilâyetiniñ Starobelskte Rusiye bölükleriniñ tamir bazasına ücüm etildi.
Teşkilâtta bu malümatnı tasdıqlamağanlar. Cenk şaraitlerinde bu beyanatlarnıñ doğrulığını teşkermek qıyın. Rusiye arbiyleri bu haberni izaatlamadı.
Daa evel berilgen malümatqa köre, İlk küzniñ 29-da aqşam ve 30-na keçer gecesi işğal etilgen Qırım ve Aqyar ücümge oğradı, bir sıra rayonlarda dronlarnıñ uçuşları, patlavlar, Rusiye MOG ve ava mudafaasınıñ atışları eşitildi.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.