Ukrayina mudafaa quvetleri Çeçekniñ 22-nde gece Rusiyeniñ bir sıra obyektine, şu cümleden işğal etilgen Qırımğa ücüm etti. Bunı Ukrayina Silâlı quvetleriniñ Baş ştabı bildire.
"Hususan, Aqyarda Qara deñiz flotunıñ arbiy gemileriniñ areketini idare etüv noqtası zarar kördi", — dep aytıla haberde.
Ştabnıñ malümatına köre, Ukrayin ordusı Rusiyeniñ Kursk vilâyetiniñ Korovâkovka ve Tetkin rayonlarında dronlarnıñ idare noqtalarına da ücüm etken.
Çeçekniñ 21-nde aqşam Aqyarnıñ Rusiye akimiyeti şeerge ücüm etilgenini bildirgen, yerli monitoring telegram kanalları şeerde küçlü patlavlar aqqında haber etken edi.
Rusiye Mudafaa nazirligi vaziyetni izaatlamadı. Qırım.Aqiqat yarımadada cenk areketleri şaraitinde bu malümatnı mustaqil olaraq teşkerip olamay.