Ukrayina Silâlı quvetleriniñ Baş ştabı ilhaq etilgen Qırımğa gece ücüm etkenini bildirdi.
Müessisede, Ukrayina ordusı RF Bryansk vilâyetinde ve ilhaq etilgen Qırımda radiolokatsiya stantsiyaları ve radioelektron istihbarat merkezlerine darbe endirdi, dep iddia eteler.
Bundan da ğayrı, haber etile ki, Mudafaa quvetleri Rusiyeniñ Krasnodar ülkesinde yerleşken "Shahed-136" dronlarınıñ saqlav ve qullanılmasına azırlıq yerlerine, ögrenüv korpuslarına, dronlarnıñ idaresi ve bağ noqtalarına ücüm etti.
Baş ştabda bildirgenlerine köre, Ukrayina Silâlı quvetleri ve Telükesizlik hızmetiniñ dronları Rusiye Federatsiyasınıñ Tambov vilâyetinde yaqarlıq-yağıt malzemeleriniñ terkibine, em de Adigeya Cumhuriyetinde neft bazasına ücüm etti. Bundan da ğayrı, Afıpa, İl, Krasnodar ve Astrahan neft zavodlarına da ücüm etildi.
Tünevin aqşam nezaret kanalları Qırımğa uçucısız uçaqlarnıñ ücüm etkeni aqqında haber etken edi. Qara deñizde tahminen 20 uçaq urıp tüşürildi, dep bildirilgen edi. Qırım.Aqiqatnıñ malümatına köre, Aqmescitte patlav sesi eşitildi. "Krımskiy veter" telekanalı Yalta civarında da patlav eşitilgenini bildire.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
