Rusiye arbiyleri yılan adasını terk ettiler, dep bildirdi Ukrayina Silâlı Quvetleriniñ baş komandanı Valeriy Zalujnıy.
"Bizim top, raketa ve avadan darbelerimizge dayanalmayıp işğalciler Yılan adasını terk ettiler. Toprağımıznıñ strategik emiyetli qısmını azat etmek içün ğayret etken Odesa imayecilerine minnetdarım. Adanıñ azat etilmesine müim isse qoşqan ukrayin "Bogdana" özüyürer gaubitsasınıñ istisalcılarına ve bünyecilerine temenna etem. Çetel ortaqlarımızğan yardım içün minnetdarlıq", - dep yazdı Zalujnıy Facebook saifesinde.
Bundan evel Ukrayina Mudafaa Nazirliginiñ "Cenüp" operativ komandanlığı Rusiye arbiyleri Ukrayina Silâlı Quvetleriniñ areketleri sebebinden Yılan adasını "ihtımal ki, terk etkeni" aqqında malümat bergen edi.
Rusiye Mudafaa Nazirligi bunı tasdıqlap, buña "hoş niyetli adım" dedi.
Qara deñizdeki Yılan adası Rusiyeniñ Ukrayinağa qarşı keniş mıqyaslı istilâsınıñ ilk künlerinden berli muvaqqat işğal altında edi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
