Ukrayina Silâlı quvetleriniñ Baş ştabı, "Neptun" raketaları ile "Kavkaz" limanınıñ neft terminalı ve Rusiye Federatsiyasınıñ Krasnodar ülkesiniñ parom keçiti urulğanı aqqında bildirdi. Bu aqta müessiseniñ Facebook saifesinde aytıla.
Ukrayina arbiyleri Rusiyeniñ Krasnodar ülkesinde daa bir neft terminalına ücüm etilgenini tasdıqlay. Tahminlerge köre, laf Temrük şeeriniñ yanındaki bir neft bazasından kete, mında üç demir yol mazut cisternası yandı.
Daa evel Rusiye Federatsiyasınıñ Krasnodar ülkesiniñ gubernatorı Veniamin Kondratyev Temrük rayonındaki neft bazasına dronlarnıñ ücüm etkeni aqqında bildirdi. Bundan da ğayrı, Amerika kâinat agentliginiñ (NASA) FIRMS sisteması yoldaşları Kavkaz limanı rayonında yanğınlarnı qayd etti.
Rusiye Mudafaa nazirligi bildirdi ki, gece Krasnodar ülkesi üzerinde beş raketa ve 29 uçucısız uçaq tüşürildi. Muarririyet bu malümatnı mustaqil olaraq teşkeremez.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
