Ukrayina Silâlı quvetleriniñ pilotsız sistemaları quvetleriniñ komandanı Robert Brovdi, 414-nci "Ptahı Madâr" silâlı taqımı saban ayınıñ 10-nda işğal etilgen Qırımda "Azovskaya" rus neft bazasında avtosisternalarğa ücüm etti, dep bildirdi. Bu aqta o, Facebookta saban ayınıñ 11-nde haber etti.
Brovdi, Canköy rayonınıñ Qalay qasabasında avtosisternalarnıñ urulğanını köstergen videonı derc etti. O qayd etti ki, ücüm 60-100 kg ağırlığında olğan Ukrayin FP-2 middle strike vastalarınen yapılğan.
Qırımnıñ Rusiye akimiyeti ücüm aqqında malümatnı izaatlamadı. Amma, Aqyarnıñ Rusiye akimiyeti ve Rusiye Mudafaa nazirliginiñ bildirgenine köre, gece Ava mudafaası Fiolent burnu ve Şimaliy tarafında doquz ava nişanını urğan.
"Krımskiy veter" telegram kanalı, Fiolent burnundaki 12-nci zenaat-raketa polkunıñ divizionı civarında patlavlar ve bir qaç uruluv olğanı aqqında haber etti, mında radar stansiyası (RLS) ve "Pantsir-S2" zenit-raketa kompleksi yerleşe eken. Rusiye akimiyeti bunıñ aqqında bildirmedi.
Qırım.Aqiqat bu malümatnı cenk şaraitlerinde mustaqil olaraq teşkerip olamay.