Rusiye Federatsiyasınıñ ordusından keçken künü 170 asker öldi, dep bildirdi Ukrayina Silâlı quvetleriniñ Baş ştabı.
Berilgen malümatqa köre, Ukrayinağa yapılğan büyük ücüm başlağanından tahminen 40 670 biñge yaqın Rusiye arbiyi öldi.
Bundan ğayrı, Ukrayina Silâlı quvetleriniñ Baş ştabınıñ malümatına köre, fevralniñ 24-nden Rusiyeniñ ğayıpları böyle oldı:
- 1759 tank
- 3995 zırhlı araba
- 906 top sisteması
- 258 çoqlu ateş raketa sisteması
- 117 ava mudafaa vastası
- 222 uçaq
- 190 vertolöt
- 733 operativ-taktik seviyeli uçucısız cihaz
- 174 qanatlı raketa
- 15 gemi/kater
- 2889 maşina tehnikası ve avtotsisterna
- 78 dane mahsus tehnika.
«(Keçken künü) duşman eñ çoq Donetsk yönelişinde zarar kördi. Malümat alına», – dep qoştı Ukraina Silâlı quvetleriniñ Baş ştabı.
Martnıñ soñunda ABD baş kâtibiniñ muavini Viktoriya Nuland Rusiyeniñ Ukrainağa qarşı cenkinde 10 biñden çoq Rusiye arbiyi öldi, dep bildirdi. Aprelniñ 15-nde Bellingcat jurnalist tedqiqatları leyhasınıñ müdiri Hristo Grozev Rusiye o vaqıt eñ az 16 biñ arbiyini ğayıp etti, dep bildirdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
