Ukrayina akimiyeti Rusiye esirliginde olğan daa bir gruppanıñ azat etilmesini ilân etti.
Ukrayina prezidenti ofisiniñ yolbaşçısı Andriy Yermaknıñ malümatına köre, Donetsk ve Lugansk vilâyetlerinde cenkleşken, hususan Bahmutnıñ mudafaasında iştirak etken 64 Ukrayina silâlı quvetleriniñ arbiyi azat etilgen.
"Bu zabitler, adiy askerler ve çavuşlar, bizim qaramanlarımız", - dep yazdı o.
Bundan ğayrı, o, 2022 senesi iyün ayında tutulğan bir ABD vatandaşı da azat etilgenini bildirdi.
Daa elâk olğan dört arbiyniñ cesedi qaytarılğan. Rusiye tarafı esir deñişüvi aqqında şimdilik daa haber etmedi.
Noyabrniñ 23-nde Ukrayina Rusiye esirliginden 35 arbiyni ve 1 vatandaşnı azat etti. Noyabrniñ 24-nde "elli ellige" deñişüv olıp keçti, dekabrniñ 6-nda ise "altmış altmışqa".
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
