«Ukrayina ilerideki seferberliknen bağlı zor qararlar qabul etmeli, amma qararlar kerek. Biz olarnıñ (seferber etilgenlerniñ – QA) azırlığı ve kerekli donatmalarına saip olğanından emin olmağa tırışamız», – dedi Blinken Brüsselde NATO azası olğan memleketlerniñ Tış işler nazirlerinen körüşüvden soñ keçirilgen brifingde.
Onıñ aytqanına köre, bu kritik emiyetke maliktir, «çünki paranen bile, silânen bile, cebede Rusiye istilâsına qarşı turmaq içün adamlar kerek».
O, PBS News telekanalına bergen intervyüsında Ukrayina cebedeki küçlerniñ sayısı ceetinden öz mevzilerini pekitmek içün daa çoq işler yapmaq kerek dep aytqan Beyaz Saraynıñ milliy havfsızlıq mesleatçısı Jacob Sullivannıñ sözlerini tekrarladı. Onıñ aytqanına köre, bu cenkte iç bir silâ sisteması vaziyetni deñiştirip olamaz, çünki laf insan resursları aqqında kete.
Ukrayina prezidenti Volodımır Zelenskıy bir qaç kere ayttı, bazı ortaqlar vade etilgen silâlarnı Ukrayinağa tez vaqıtta bermey. Noyabr ayında «Ukrayina radiosına» bergen intervyüsında o, Ukraina ABD tarafından vade etilgen yardımnıñ yarısını aldı, dep ayttı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
