Rusiye ordusı martnıñ 18-ne keçer gecesi Ukrayinağa 137 Shahed darbe uçucısızı ve çeşit dronlarnen ücüm etti, dep bildirdi Ukrayina silâlı quvetleriniñ Ava küçleri.
«Saat 09:00-da 63 Shahed darbe uçucısızı ve diger uçucısızlarnıñ Harkiv, Poltava, Sumı, Çerniğiv, Çerkası, Kyiv, Vinnıtsâ, Kirovoğrad, Dnipropetrovsk, Zaporijjâ, Mıkolayıv ve Herson vilâyetlerinde yoq etilgeni tasdıqlandı. 64 duşman uçucısızı coyuldı (menfiy aqibetleri olmadı)», – dep aytıla haberde.
Arbiylerniñ malümatına köre, Rusiye ücümi neticesinde Harkiv, Sumı, Poltava, Dnipropetrovsk ve Çerkası vilâyetleri zarar kördi.
Ukrayina tarafı Rusiyege qarşı yapılğan ava ücümleri aqqında haberni şimdilik izaatlamadı.
Saban ayınıñ 11-nde ukrayin dronları Moskva ve Moskva vilâyetine misli olmağan ücüm etti. 90 dane uçaq ücüm etken Moskva civarında üç insan elâk oldı. Umumen 300-den ziyade uçucısız uçaq bar edi.
Rusiyeniñ Ukrayinağa tam miqyaslı istilâsı başlağan soñ, Rusiye regionları muntazam sürette ateşke ve uçucısız uçaqlarnıñ ücümlerine oğray. Rusiye Mudafaa nazirligi, Rusiye territoriyasında tüşürilgen raketa ve dronlar aqqında esabat bere. Kıyiv bu haberlerni izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
