Qırımnıñ işğaline tirenüv kösterüv kününde Ukrayina prezidenti Volodımır Zelenskıy yarımadanıñ işğalden azat etilmesi meselesi halqara kün tertibine qaytarıldı, Ukrayina akimiyeti Rusiyege Qırımnıñ ilhaqını «normalleştirmege» imkân bermedi, dep bildirdi.
Onıñ hatırlatqanına köre, Rusiyeniñ Ukrayinağa qarşı istilâsı 11 yıl evelsi Qırım işğalinen başladı, amma fevralniñ 26-nda qırımlılar «tirenüv azırlığını» kösterdi.
«Fevralniñ 26-sı tirenüv olacağını kösterdi – Qırım tirenüvi, bütün Ukrayinanıñ tirenüvi. Bu kün yalannı qabul etmegen ve evini bermeycek insanlar bar olğanını kösterdi. Qırım işğalinden soñ yıllar çoq qasevet ve tsinizm ketirdi. Dünyada pek az insan neler olğanını añlamağa istemedi», – dep yazdı Zelenskıy Telegram kanalında.
Onıñ qayd etkenine köre, Ukrayinanıñ topraq bütünligi, suvereniteti ve telükesizligi «bir uzlaşuv meselesi degil ve olmaycaq».
Qırım işğaline tirenüv künü –fevralniñ 26-nda qayd etilgen hatıra künüdir. 2014 senesi bu künü Aqmescitte Qırımtatar Milliy Meclisi tarafından teşkil etilgen Ukrayina topraq bütünligine qoltutuv mitingi olıp keçti. Aktsiya Rusiye işğaline qarşılıq kösterüviniñ esas tedbirlerinden biri oldı.
2020 senesi Ukrayina prezidenti öz buyruğınen fevralniñ 26-nı Qırım Muhtar Cumhuriyeti ve Aqyar şeeriniñ işğaline tirenüv kösterüv resmiy künü olaraq tasdıqlap, yarımadanıñ Ukrayina suverenitetine qaytarılması içün küreşniñ müimligini qayd etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
