Ukrayina Rusiye ile muzakerelerniñ nevbetteki turına azır, amma Moskvadan ateşkes tekliflerinen memorandum bekley. Bu aqta Ukrayina Tış işler naziri Andriy Sıbiğa mayısnıñ 30-nda Türkiye zenaatdaşı Hakan Fidannen Kyivde körüşip ayttı.
«Bu körüşüvlerniñ devam etmesini isteymiz. Bu cenkni bu yıl bitirmege isteymiz. Biz barışıq isteymiz. Ukrayinan bunı doğrudan Rusiyenen muzakere etecek. Soñki körüşüvlerde bunı tasdıqladıq», – dedi Sıbiğa.
Moskvadan qaytqan Türkiye Tış işler naziri Ukrayina akimiyetinen barışıq esnasınıñ devamına dair fikirlerinen paylaştı. Fidan mayısnıñ 16-nda keçirilgen İstanbul muzakereleri barışıq esnasına yañı impuls berdi.
«Biz cenkniñ mümkün olğanı qadar tez bitmesini isteymiz», – dep qayd etti Türkiye Tış işler naziri.
Mayısnıñ 16-nda İstanbulda Rusiye ve Ukrayina eyyetleri arasında muzakerelerniñ birinci turı keçti. Rusiye eyyetiniñ başında Rusiye prezidentiniñ yardımcısı Vladimir Medinskiy bar edi. Putin Tış işler naziriniñ muavini Mihail Galuzin, Rusiye Silâlı quvetleri Baş Ştabınıñ Baş idare yolbaşçısı İgor Köstükov, Mudafaa naziriniñ muavini Aleksandr Fomin ve dört «ekspertni» de yolladı.
Taraflar büyük ilerilevge irişemese de, faqat «1000-ge 1000» formatında cenk esirlerini deñişmege añlaştı. Deñişüvniñ soñki basamağı mayısnıñ 25-nde yekünlendi.
Eki taraf üç yıl içinde ilk sefer muzakere masası başına oturdı. Ukrayina ateşni 30 künge toqtatmağa talap etti. Lâkin Rusiye tarafı topraq isteklerinden öyle de vazgeçmedi – dört Ukrayina vilâyetinde öz suverenitetiniñ tanılmasını istey, Moskva bunı ateş toqtatıluvınıñ şartı olaraq bildire.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
