Ukrayina mudafaa quvetleri Rusiyeniñ Yaroslavskiy neft zavodındaki cermay işlep çıqaruv tertibatına ücüm etti, dep haber ete Ukrayina mudafaa quvetleriniñ Baş ştabı.
Ukrayina ştabında qayd eteler ki, zavodnıñ mahsulatına benzin, dizel ve reaktiv yaqarlıq kirmekte ve Rusiye ordusınıñ logistika temininde müim ola.
Bundan da ğayrı, Rusiye Federatsiyasınıñ Astrahan vilâyetinde "Astrahanskiy" gaznı işlep çıqarğan zavodınıñ infrastrukturası zarar körgenin tasdıqlandı.
Ukrayina arbiyleri qayd eteler ki, müessise istilâcı devletniñ gaz-naqliyat ve yaqıt infrastrukturasınıñ eñ müim elementi ola ve RF arbiy-sanayı kompleksiniñ ihtiyaclarını temin etmekte iştirak ete.
Zararnıñ kölemi daa belli degil.
Rusiye Federatsiyasınıñ Yaroslav vilâyetiniñ gubernatorı Mihail Yevrayev bildirdi ki, Yaroslavda urulıp tüşürilgen uçaqnıñ parçaları sanayı obyektine tüşti, kimse zarar körmedi.
Rusiye Mudafaa nazirligi bildire ki, keçken gece Belgorod, Brânsk, Voronej, Kursk, Rostov, Tambov, Râzan, Astrahan vilâyetleri, Krasnodar ülkesi, Kalmıkistan Cumhuriyeti, ilhaq etilgen Qırım ve Azaq ve Qara deñizlerniñ üzerinde 286 Ukrayin uçucısız uçaq zararsızlandırıldı.
Ukrayinağa qarşı Rusiyeniñ keñ kölemli basuvı başlanğan soñ Rusiyede ve o, işğal etken topraqlarda çeşit obyektler ava ücümlerine oğray. Eñ sıq 2024 ve 2025 seneleri ücüm sebebi cermay zavodları ola. Ukrayinanıñ işğal altındaki topraqlarında da Rusiye obyektleri ücümlerge oğray.
Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğal ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.