Ukrayina yañı sanktsiyalarnı tayin etti. Olar kollaborantlarğa ve Rusiye Federatsiyasınıñ aviatsiya infrastrukturasınıñ işini temin etkenlerge ait, dep bildirdi Ukrayina prezidenti Volodımır Zelenskıy yañı video muracaatında.
Ukrayina lideri qayd etti ki, o, daa evel MTMŞ tarafından qabul etilgen bir sıra sanktsion qararnı imzaladı.
"Bugün (sentâbrniñ 1-nde — QA) men bir qaç yañı sanktsiya qararını — MTMŞ sanktsiyalarını imzaladım. Aman-aman 150 subyekt — Rusiyeniñ aviatsiya infrastrukturasınıñ işini temin etken uquqiy ve fizikiy şahıslardır. Bundan da ğayrı, kollaborantlarğa qarşı daa bir sanktsiyalar paketi", — dep bildirdi Zelenskiy.
"Bütün Ukrayina vekilleri içün vazife — Ukrayina sanktsiyalarınıñ dünya sanktsiyaları ile uyğunlaştırılması".
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
