140-tan çoq Ukrayına vatandaşı Rusiyede siyasiy sebepli qabaatlavlar esasında qanunsız bir şekilde apiste tutula. Olarnıñ sayısı artmağa devam ete, dep bildirdi Ukrayına Tış işler naziriniñ birinci muavini Emine Ceppar.
Ukrayına Tış işler nazirliginiñ matbuat hızmeti bildirgenine köre, dekabrniñ 8-nde İnsan aqları künü arfesinde Ukrayına Tış işler nazirliginde ukrayınalı siyasiy mabüslerniñ Rusiyeden azat etilüvinen bağlı halqara areket platformasınıñ üçünci toplaşuvı olıp keçti.
Ukrayına Tış işler nazirligi Rusiye Ukrayınağa büyük istilâ etken soñ işğalci akimiyet qırımlı siyasiy mabüslerniñ ükümlerini çıqardı, umumiy apis cezası 1300 yıldan ziyade ola.
«Qırım platforması», dünya devletleriniñ ve halqara teşkilâtlarnıñ ğayretlerini Qırım yarımadasını işğalden azat etmek içün birleştirgen mehanizm çerçivesinde büyük iş yapıla. Ğayretlerniñ büyük qısmı vaqtınca işğal etilgen Ukrayına topraqlarında insan aqlarını temin etmek içün yapıla», – dedi Ceppar.
Onıñ aytqanına köre, Ukrayına Tış işler nazirligi ukrayınalı siyasiy mabüsler meselesine diqqat celp etmek içün informatsion kampaniyalar keçire.
«Bunıñnen beraber daa şahıslaştıruv yanaşuv ve leyhalarnı qullanamız. Rusiyede qanunsız alda apiske alınğan vatandaş jurnalistleriniñ açıq advokatsion mentorlıq teşebbüsleri devam ete. Advokatsion mentorlar Qırımda vatandaş jurnalistleriniñ qanunsız tutuluvını aydınlata, içtimaiy ağlardaki saifelerinde Rusiyede qanunsız tutulğan Ukrayına vatandaşlarına diqqat celp etmek içün dünya meşurlığını qullanalar», – dep qoştı o.
Ukrayınalı siyasiy mabüslerniñ Rusiyeden azat etilüvinen bağlı halqara areket platforması – Rusiyede siyasiy sebeplerden qanunsız tutulğan Ukrayına vatandaşlarını azat etüv işlerinen oğraşqan ükümet sektorı ve vatandaş cemiyetiniñ ğayretlerini birleştirmek içün 2020 senesi iyul ayında teşebbüs kösterilgen resmiy olmağan bir mehanizm.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
