Ramazan ayı munasebetinen Ukrayına Rusiyege İslâm dinini kütken cenk reinelerini «er kesni er keske» şeklinde deñiştirmege teklif etti. Rusiye bu teklifni red etti. Bu aqta «Amerikanıñ Sesine» intervyü bergen Ukrayına prezidenti ofisiniñ bağ mesleatçısı Darya Zarivna ayttı.
«Biz musulmanlarnı dinlerine ve ananelerge ürmet olaraq eki taraftan «er kesni er keske» şeklinde deñiştirmege teklif etti. Ne yazıq ki, Rusiye tarafı bu ğayeni büyük şevqnen qabul etmedi», – dep qayd etti Zarivna.
O, Rusiye ile muzakerelerni «bizimkilerni çıqarmaq içün yañı-yañı usullarnı tapacaq, devam etmesi kerek olğan qıyın bir esnas» dep adlandırdı.
Rusiye Ukrayına prezidenti ofisi vekiliniñ aytqanlarını izaatlamadı.
Ukrayına ombudsmeni Dmıtro Lubinetsniñ soñki malümatına köre, Rusiye 116-sı qırımtatarı olğan 180 qırımlı siyasiy mabüsni qanunsız bir şekilde tuta.
Keçken seneniñ soñunda Ukrayına qırımtatarı, «Azovstalniñ» tibbiyet hadimi Asan İsenaciyevni Rusiye esirliginden qaytarıp oldı.
Rusiyeniñ tam istilâsı başlamazdan evel Ukrayına prezidenti Volodımır Zelenskıy Qırım kütleviy haber vastalarına intervyü berip, Kreml ukrayınalı siyasiy mabüsler, hususan qırımlılarnıñ Rusiye apsinden azat etüv esnasını «toqtata», dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
