Ukrayina, fevral ayından berli ilk sefer keçirilgen Rusiye ile esirlerniñ nevbetteki deñişimi çerçivesinde 75 vatandaşını qaytardı, dep bildirdi Ukrayina lideri Volodımır Zelenskıy.
"Bugün müim bir neticemiz bar: daa 75 adamımız Ukrayinağa qayttı. Ukrayina Silâlı quvetleri ve Milliy gvardiyasınıñ askerleri, sıñırcılar, dört vatandaş — olarnıñ episi endi tuvğan toprağında", — dep yazdı Zelenskıy içtimaiy ağlarda.
Rusiye Mudafaa nazirligi deñişim çerçivesinde 75 Rusiye arbiy hızmetçisiniñ qaytqanını bildirdi. Deñişimde Birleşken Arap Emirlikleri aracılıq yaptı.
Bugün Ukrayina ve Rusiye de elâk olğanlarnıñ cesetlerini deñiştirdiler. Ukrayinanıñ cenk esirleri ile munasebet meseleleri koordinatsion ştabı, Ukrayina 212 elâk olğan arbiy hızmetçiniñ cesedini qayttı, dep bildirdi. Bu Donetsk, Zaporojjâ, Luğansk, Harkiv yönelişlerinde cenk areketlerinde iştirak etken arbiyler.
Ukrayina ve Rusiye arasında soñki esir deñişimi fevralniñ 8-nde olıp keçti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
