Ramazan ayınıñ başlaması munasebeti ile Ukrayina Rusiyege islâm dinini kütken arbiy esirlerni "episini episine" deñiştirmege teklif etti. Rusiye bu tekliften red etti. Bunı Prezident ofisiniñ yolbaşçısınıñ kommunikatsiyalar üzre mesleatçısı Darya Zarivna "Amerika Sesi"ne intervü berir eken bildirdi.
"Olarnıñ medeniyeti ve adetlerine ürmet kösterip er eki taraftan da musulmanlarnı "episini episine" deñiştirmek teklifinde bulundıq. Yazıq ki, Rusiye tarafı bu ğayeni coşqunlıqnen qarşılamadı", - dep qayd etti o.
O, Rusiye ile aytışmalarğa "bizimkilerden daa çoqunı azat etmek içün yañı yollar qıdırıp, devam etmesi kerek olğan qıyın esnas" dedi.
RF Ukrayina Prezidenti ofisiniñ temsilcisiniñ sözlerini izaatlamadı.
Ukrayina Ombudsmanı Dmıtro Lubinetsniñ bildirgenine köre, Rusiye 116-sı qırımtatar olğan 180 qırımlı siyasiy mabüsni qanunsız sürette tevqif etken.
Dekabrniñ 31-nde Rusiye esirliginden qırımtatar, "Azovstal" ekimi Asan İsenaciyev azat etilgen edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
