Zelenskıy qayd etti ki, bu çarşenbe künü de Rusiye esirliginden daa 197 ukrayinalı qaytarıldı.
"Esirlikte bulunğan er kesni, bütün arbiy adamlarımıznı, bütün vatandaşlarımıznı unutmadıq", — dep bildiridi Zelenskıy, ve esirlerniñ azat etilmesi meselesi halqara ortaqlarınen muzakerelerinde esas mevzulardan biri ola, dep qoştı.
"Er bir muzakeremde, yardım ete bilecek ortaqlarımıznen olğan bütün körüşüvlerde, ukrayinler, esirlerimiz aqqında sual mecburiydir. Şimdi, bizler Amerika tarafı ve diger ortaqlarımıznen cenkni nasıl bitirecegimiz aqqında laf etkende, esirlerniñ azat etilmesini birinci müim adımlardan biri olaraq qayd etemiz. Bizler bunıñ kerçekten de keregi olğanını tüşünemiz. Bu işte bizge qol tutqan bütün ortaqlarğa teşekkürlerimni bildirem", — dep ayttı prezident.
Saban ayınıñ 19-nda Volodımır Zelenskıy bildirdi ki, Ukrayina ve Rusiye 175 ukrayinalı arbiy hızmetçisini azat etip, esirlerni deñiştirdi. Bundan ğayrı, Moskva 22 ağır yaralanğan kişini teslim etti.
Bundan evel esirlerni deñişüv yanvarniñ 15-nde olıp keçken edi, o vaqıt Ukrayina 25 vatandaşını qaytarğan edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
