Ukrayina arbiyleri dekabrniñ 6-na keçer gecesi Rusiye atqan 32 darbe uçucısızını urıp tüşürdi, 16-sı «yerde ğayıp oldı», ekisi Beyazrusiye tarafına uçtı, dep bildirdi Ukrayina Silâlı quvetleriniñ Ava küçleri.
Qayd etilgenine köre, Rusiye arbiyleri Ukrayinağa 53 Shahed darbe uçucısızınen ve diger uçucısızlarnen ücüm etti. Harkiv, Poltava, Sumı, Çerniğiv, Kyiv ve Jıtomır vilâyetlerinde dronlar tüşürildi.
Kyiv şeer yolbaşçısı Vitaliy Klıçko haber etkenine köre, şeerniñ Ğolosiyıvskıy rayonında yolda uçucısız parçaları tapıldı. Yaralanğanlar aqqında malümat yoq.
Rusiye arbiyleri çeşit silâlardan muntazam sürette ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
