Link açıqlığı

Saatnıñ esas haberi

Ukrayına Rusiye darbelerine dayanıp, Qırımnı qaytaracaq – Zelenskıy


Volodımır Zelenskıy
Volodımır Zelenskıy

Ukrayına prezidenti Volodımır Zelenskıy, Rusiyeniñ yañı strategiyası – memleket sakinlerini elektriksiz suvuqta qaldırmaq maqsadınen energetika infrastrukturasına darbe endirmek – Ukrayınanıñ iradesini bozıp olamaz ve topraqlarınıñ azat etilüvine mania olamaz, dep ayttı. Bu aqta Zelenskıy Financial Times Britaniya neşirine bergen intervyüsında ayttı.

Ukrayına prezidenti, Ukrayınanıñ cenkteki maqsadı – Qırımnen beraber memleketniñ halqara seviyede tanılğan topraqlarında kontrolini qaytarmaqtır, dep ayttı.

Zelenskıynıñ fikirince, Rusiye darbeleriniñ maqsadı – Ukrayınanı topraq uzlaşuvlarına ya da zıddiyet toqtatıluvına mecbur etmektir. Faqat, Ukrayına prezidentiniñ aytqanına köre, zıddiyetniñ toqtatıluvı cenk areketleriniñ ileride yañıdan başlaycağını işaret etecek, barışıq ise tek topraq bütünliginiñ ğayrıdan tiklenmesine bağlı ola.

Zelenskıy Qırım meselesini köterip, Ğarpta onıñ toprağını arbiy yolnen azat etüv meselesinde çeşit fikirleri bar, dep ima etti. «Qırımnı cenknen bağlı olmağan yolnen işğalden qurtaruv yolunı teklif etecek birisi olsa, tek qoltutarım» – dedi Ukrayına prezidenti, lâkin Qırımnıñ Rusiye kontroli altında qalacaq barışıq qararlarını Ukrayına qabul etmeycek: «Olarğa kimse vaqıt coymamalı».

Kütleviy haber vastaları ABD prezidentiniñ milliy telükesizlik mesleatçısı Jacob Sullivan Ukrayınanı Qırım içün cenkleşmekten vazgeçtirmege istedi, dep bildirgen edi. Resmiy şekilde bunı tasdıqlamadılar.

Fevralniñ 24-nde başlağan büyük Rusiye istilâsından evel ve belli bir vaqıt devamında Ukrayına Qırımnı arbiy yolnen azat etmege istemey, dep aytqan edi. Lâkin soñra Kyivniñ planları deñişti ve şimdi barışıq añlaşmasınıñ şartı olaraq bütün topraqlarnıñ qaytarıluvı talap etile.

Rusiye ordusı Hersondan çekilgen soñ Qırımnıñ şimaliy rayonları Ukrayınada olğan HIMARSnıñ ücümleri altında qaldı. Qırımnıñ Rusiye akimiyeti yarımada şimalinde imaye inşaatlarını qura, dep haber etilgen edi.

Rusiyeniñ Ukrayına infrastrukturasına açqan ateşleri neticesinde memleket sakinleriniñ büyük qısmı elektrik, suv ve qızdıruv problemlerini çeke. Noyabrniñ 23-nde olğan büyük darbe blekautnıñ sebebi oldı. Noyabrniñ 25-nde Ukrayınanıñ büyük qısmı daa ışıqsız qala; Kyivde, akimiyet bildirgenine köre, künde 2-3 saat ışıq berilecek.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG