Ukrayınanıñ vaqtınca işğal etilgen topraqlarınıñ reintegratsiya meseleleri naziri İrına Vereşçuk rusiyelilerniñ Qırımnı "artıq terk etmesini" tevsiye etti.
Vereşçuknıñ sözlerine köre, Qırımnıñ işğalden azat etilmesinden soñ Ukrayina akimiyeti içün esas prioritetlerden biri "rus müstemlekecilerniñ ve kollaborantlarnıñ qaderine qarar bermek" olacaq.
"Birinciden, men şimdiden böyle insanlarğa (rusiyelilerge - QA) ketmekni ve bu ya da diger şekilde olardan talap etilecek alğa kelmesine beklememekni tevsiye etem", - dedi nazir.
Halqara uquq kollektiv sürgün etmeni köz ögünde tutmağanı içün Qırımğa qanusız şekilde kelgen Rusiye vatandaşları individual qararlarğa köre yarımadadan çıqarılacaq. Bunı Ukrayina Prezidentiniñ Qırım MC daimiy temsilcisi Tamila Taşeva "Ukrinform" ukrayin agentligine intervyü berir eken bildirgen edi.
Aprelniñ başında Ukrayina Milliy telükesizlik şurasınıñ kâtibi Oleksiy Danılov "Qırımnıñ işğalden azat etilmesi içün 12 adım" adlı yazını yayınlağan edi. Teklifler arasında "rus şerefi şeeri"niñ " "Obyekt № 6" olaraq yañıdan adlandırılması da bar.
Bundan ğayrı Danılov Qırımda "Rusiye arbiy gemisi siktir ket" abidesini tiklemege, 2014 senesinden soñ Qırımğa kelgen RF vatandaşlarını andan sürgün etmege ve Qırım köprüni sökmege teklif etken edi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
