Ukrayinanıñ vaqtınca işğal etilgen topraqlarınıñ reintegratsiya meseleleri nazirligi Rusiyede tutulğan qırımtatar Leniye Umerovanıñ azat etilmesini talap ete. Bunıñ aqqında nazirlikniñ telegram kanalında yazıla.
"2014 senesi Qırımnıñ işğalinden soñ Rusiye akimiyeti muntazam tarzda qırımtatarlarğa qargı cinayetler ete. Qorqutuv, tintüvler, qanunsız yaqalavlar, tamır halqlarğa qarşı nefret doğuruv - Rusiye mahsus hızmetleriniñ adiy iş usullarıdır", - dep yazıla bildirmede.
Umerovanı tutıp Rusiye akimiyeti Cenk vaqtında asker olmağan şahıslarnıñ mudafaası aqqında Şartnameniñ maddelerini boza, dep qayd ettiler nazirlikte.
Reintegratsiya nazirligi çetel devletlerniñ ükümetlerine ve halqara teşkilâtlarğa, hususan da Halqara "Qırım platforması"nıñ iştirakçilerine Rusiye topraqlarında ve vaqtınca işğa etilgen topraqlarda Ukrayina vatandaşlarınıñ aqlarınıñ yañı qaba bozuvlarına yol bermemek maqsadınen Rusiye Federatsiyasına qarşı diplomatik, sanktsiyalar ve diger tazyıq türlerini arttırma talabınen muracaat etti.
"Davanıñ tafsilâtlı baqılmasını ve Ukrayina vatandaşı Leniye Umerovanıñ azat etilmesini talap etemiz", - dep qayd ettiler nazirlikte.
Rusiye Federatsiyasında tutulğan Leniye Umerovanıñ ağası Aziz Umerov «yapqan yekâne «cinayeti» Qırımda doğğanına baqmadan, Rusiye pasportını almaması oldı», dep qayd etti.
«Terrorist memleket halqara uquq normalarını bozıp, qabaatsız insannı, 25 yaşında qıznı – Ukrayina vatandaşını reine olaraq tuta. Lâqayt olmağan bütün cemaat faalleri, aq qorçalayıcı teşkilâtlar, devlet akimiyeti organlarını Leniyeni esirlikten azat etüvde yardım etmelerine çağıram», – dep muracaat etti cemaatçılıqqa Aziz Umerov.
Rusiye uquq qoruyıcıları Leniye Umerovanıñ tutuluvı aqqında resmiy şekilde bildirmey.
Aq qorçalayıcılarnıñ malümatına köre, Ukrayinağa qarşı tam istilâ başlağan soñ işğal etilgen topraqlarda Rusiye uquq qoruyıcıları Ukrayina vatanperverleri, göñülli, cemaat faalleri, jurnalist, ATO/OOS veteranlarını daa sıq hırsızlap başladı. Çoqusı işğal etilgen Qırımğa çıqarılıp, SİZOğa qapatıla.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
