Aprelniñ 4-nde Ukrayina Nazirler şurası qırımtatar tiliniñ yañı imlâ qullanıluvını tasdıqladı. Vesiqa üzerindeki iş 2023 senesinden başlap devam ete, dep haber etti aprelniñ 5-nde Ukrayina prezidentiniñ temsilciligi.
İmlâ 2021 senesi sentâbr ayında tasdıqlanğan elifbege esaslana ve «zemaneviy til tendentsiyaları ve qırımtatar tiliniñ tarihiy ananesine uyğun» latin urufatını közde tuta.
«Tasdıqlanğan qaideler yazılış, ögrenüv, media, edebiyat ve toponimikada qullanuvdan ibaret. Bütün devlet organları, hususan yerli memuriyetler ve arbiy memuriyetler, şu cümleden vaqtınca işğal etilgen Qırım Muhtar Cumhuriyeti ve Aqyar şeerinde qullanuvğa tevsiye etile», – dep aytıla haberde.
Ukrayina prezidentiniñ temsilciligi yazğanına köre, imlânıñ yañı qaideleri üzerinde belli tilşınas, alim ve qırımtatar halqınıñ vekilleri çalıştı. Bu işke Ukrayina tasil ve ilim nazirligi, Ukrayina Milliy ilimler akademiyasınıñ O.A.Potebnâ Tilşınaslıq institutı, Taras Şevçenko Kyiv milliy universiteti, Qırımtatar Milliy Meclisi ve diger mütehassıslar qoşuldı.
Dekabrniñ soñunda Qırımtatar Milliy Meclisiniñ reisi Refat Çubarov Ukrayina Nazirler şurası 2025 senesiniñ ilk ayları qırımtatar tiliniñ imlâsını resmiy şekilde tasdıqlay bile, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
