Ukrayina Qırımdan bir vaqıt vazgeçmeycek, Qırım yarımadasını qaytaruv küreşi ise «Ukrayina serbestligi ve mustaqilligi oğrunda küreşniñ ayırılmaz parçası» ola. Bu aqta oktâbrniñ 24-nde Ukrayina Yuqarı Radasınıñ spikeri Ruslan Stefançuk Latviyanıñ paytahtı Rigada keçirilgen «Qırım platforması» Üçünci parlament sammitinde bildirdi.
«İstilâcı tarafından vaqtınca işğal etilgen Ukrayina toprağınıñ bir parçasından vazgeçmegenimiz kibi Qırımdan da iç bir vaqıt vazgeçmeycekmiz. Bizim içün Qırımnı azat etüvniñ alternativası yoq. Bu bizim toprağımız ve anda bizim halqımız yaşay», – dedi Stefançuk.
O, sammit iştirakçilerini öz memleketleriniñ parlamentleri tarafından qırımtatar halqınıñ sürgünligini genotsid olaraq tanımaq imkânını baqmağa çağırdı. Onıñ aytqanına köre, «qırımtatar halqı adalet tiklenmesini arz ete».
Oktâbrniñ 24-nde Rigada «Halqara Qırım platforması» üçünci parlament sammiti öz işini başladı. Oktâbrniñ 23-nde resmiy olmağan qısmı başlandı – qırımtatar halqınıñ vekilleri tarafından teşkil etilgen tedbirler. İştirakçiler arasında Qırımtatar Milliy Meclisiniñ reisi Refat Çubarov, deñişüv çerçivesinde Rusiye apishanesinden azat etilgen Meclis reisiniñ muavini Nariman Celâl ve Qırımtatar Resurs Merkeziniñ yolbaşçısı Eskender Bariyev.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
