«Duşman propagandası tarafından «yoq etilgen» Ukrayına uçaqları vazifelerini yerine ketirmege kene devam ete, işğalcilerniñ mevzilerine qarşı raketa-bomba darbelerini endire ve duşmannıñ teren arqasında müim arbiy obyektlerni yoq ete. 2024 senesi iyülniñ 1-nde Ukrayına uçucıları Qırımda silâ anbarına qarşı büyük darbe endirdi», – dep bildirdi Ukrayına Silâlı quvetleriniñ komandanı Mıkola Oleşçuk.
Aynı vaqıtta Telegram kanalları darbe Shahed uçucısızlar anbarına endirildi, dep haber ete. Rusiye akimiyeti anbarğa qarşı ücüm haberlerini izaatlamadı.
Bundan evel Aqyarda Felenk burnu tarafında ve Balıqlava issilik elektrostantsiyası rayonında patlavlar eşitildi, dep haber etilgen edi. Şeerniñ Rusiye yolbaşçısı Mihail Razvojayev Aqyarğa beş ava nişanınen ücüm etildi, dep bildirdi.
Onıñ aytqanına köre, olar Balıqlava rayonında yoq etildi. Bunıñnen beraber, Razvojayev aytqanına köre, orman yolağında yanğın çıqtı, mustaqil evlerniñ qoraları ve eki bağçada ot yandı, evlerden biriniñ camları patladı, üç maşina zarar kördi.
«Krımskiy veter» Telegram kanalı yazğanına köre, Balıqlavada Flotskoye (Karan) köyü yanındaki arbiy bölükte patlav ve yanğın oldı. Patlağan şey ne edi daa belli degil. Bu malümatnı mustaqil menbalarda tasdıqlamaq şimdilik mümkün degil.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
