Ukrayina Silâlı quvetleriniñ Baş ştabı işğal etilgen Qırımdaki «Kaça» uçaq alanına darbe endirgenini tasdıqladı. Bu haber müessiseniñ Telegram kanalında peyda oldı.
Ukrayina arbiyleri eki Rusiye uçağına darbe endirildi, dep bildirdi.
«Ukrayina Mudafaa nazirligi Baş istihbarat idaresiniñ bölükleri duşmannıñ vastalarına ücüm etti. Ücüm neticeleri ve seviyesi ögrenile», – dep aytıla haberde.
Sentâbrniñ 22-nde aqşam Qırımnıñ Telegram kanalları uçucısızlarnıñ Aqyarğa qarşı ücümi aqqında yazdı. Şeerniñ Rusiye yolbaşçısı Mihail Razvojayevniñ aytqanına köre, altı dronnı ava mudafaa quvetleri şeerge yaqınlaşqanda urıp tüşürdi, daa bir danesini – Kaça civarında. Anda ot yanıp başladı, dep haber etildi.
Kaça qasabasında Rusiye Qara deñiz flotuna ait Rusiye arbiy uçaq alanı bar. Anda 318-inci ayrı qarışıq aviatsiya polku yerleşe. Bölükniñ An-26, Be-12 uçaqları ve Ka-27 vertolötları bar.
2022 senesinden başlap Qırım aman-aman er kün uçucısız ve raketalarnıñ ücümlerine oğray. Rusiye akimiyeti arbiy obyektlerge ücüm yapılğanını inkâr ete.