Aynı vaqıtta, Ukrayına Silâlı Quvetleriniñ komandanı Mıkola Oleşçuk Qırımdaki patlavlarnı izaatlap, Ukrayına uçucılarına «örneksiz cesür işleri» içün minnetdarlıq bildirdi.
«Duşman propagandasından yanvarniñ 4-nde Aqyar ve Kezlevden de aynı epik esabatını bekleyim ve Silâlı Quvetlerniñ uçucılarına, operatsiyanı planlaştırğanlarğa cesür işleri içün daa bir kere teşekkürler bildirem!», – dep ayttı Mıkola Oleşçuk Telegram kanalında.
Oleşçuk «Krımskiy veter» Telegram kanalınıñ paylaşuv resmini derc etti, anda Kezlev civarında Rusiye ava mudafaa quvetleriniñ arbiy bölügine darbe aqqında haber etildi. Bu malümat mustaqil şekilde tasdıqlanmay.
Cumaaqşamı künü Qırım.Aqiqat mühbiri Aqyarda ava telükesi ilân etilgen soñ tahminen 10 patlav eşitildi, dep bildirdi. Şeerniñ Rusiye yolbaşçısı Mihail Razvojayev «bir qaç ava nişanı tüşürildi», dep ayttı.
Rusiye Federatsiyasınıñ Mudafaa nazirligi Qırımda 10 raketanı yoq etti, dep bildirdi. Rusiye müessisesi idare etilgen aviatsiya raketaları aqqında aytıp, Ukrayınanı qabaatladı. Kyiv bunı daa izaatlamadı. Muarririyetniñ Rusiye akimiyetiniñ malümatını isbatlaycaq delilleri yoq.
Razvojayev Gluhov soqağındaki evge tüşken parçasından bir kişi yaralandı, dep haber etti. Parçalarnıñ bir qısmı Şimaliy taraftaki Mostovaya soqağı rayonına, Monastırskoye şosse ve Fedühinı vısotı civarında tüşti.
«Krımskiy veter» Telegram kanalı Yuharina Balka civarında darbe oldı, dep haber etti. Qırım.Aqiqat jurnalistleri azırlağan interaktiv haritağa köre, anda Rusiye Federatsiyası Ava-kâinat quvetleriniñ Ava mudafaa sistemasınıñ 31-inci diviziyası yerleşe. Eski bir yedek ava mudafaasınıñ komandan noqtası.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
