Ukrayina Tış işler nazirligi Qırım ve Aqyarda Rusiye saylavlarınıñ keçirilüvini izaatlap, bu halqara uquq norma ve temellerini bozuv ola ve bu rey berüv qanunsız ola, dep bildirdi.
«Rusiye Federatsiyasında sahte «saylavlar» çoqtan berli demokratiyanıñ ifadelenmesinen iç bir alâqası olmağan farsqa çevirildi ve olarnıñ halqara uquq normaları ve printsiplerini bozıp, Ukrainanıñ muvaqqat işğal etilgen territoriyalarında keçirilmesi asılında Rusiye siyasiy sistemasını legitimsizleştire. Daa bir kere qayd eteyik ki, vaqtınca işğal etilgen Qırım Muhtar Cumhuriyeti ve Aqyarda olıp keçken sahte «saylavlar» neticeleriniñ qıymeti yoq, «saylavlarnıñ» özü ise qanunsız ola.
Ukrayina Tış işler nazirligi qayd etkenine köre, «Ukrayinanıñ muvaqqat işğal etilgen topraqlarında sahte saylavlarğa azırlanuv ve keçirüvde iştirak etkenlerniñ episi Ukrayinanıñ qanunlarına köre mesüliyetke çekilecek».
«Sarı şerit» areketi qırımlılarnı Rusiye sentâbrniñ 6-ndan 8-ne qadar işğal etilgen Qırım yarımadasında keçirgen qanunsız saylavlarnı körmemezlikke urmağa çağırdı.
Rusiye akimiyeti sentâbrniñ 6-ndan 8-ne qadar işğal altındaki Qırım ve Aqyarda Rusiye qurğan Qanun çıqarıcı toplaşuv, Rusiye kontrolindeki Qırım parlamenti, şeer ve köy şuralarınıñ deputatları qanunsız saylavlarını keçire.
Bu sahte saylavlarda resmiy halqara közeticiler yoq. Halqara toplulıq, BM, OSCE ve diger teşkilâtlar bu saylavlarnı, netice ve deputatlarını tanımaylar.
Rusiye akimiyetiniñ malümatına köre, Qırımnıñ Rusiye parlamenti, şeer ve köy şuralarınıñ deputatlar saylavlarında aman-aman 1,5 mln yarımada sakini iştirak etecek. Qırımda 1129 saylav bölügi açıldı. Umumen Qırımda 265 saylav kampaniyası keçirile, 2979 deputat mandatı olacaq, 75-i – Qırımnıñ Rusiye parlamentine.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
