Ukrayına Mudafaa nazirliginiñ Baş istihbarat idaresi Andriy Yusov Qırım ve Aqyarda Rusiye tehnikası olğan yerlerge raketa ücümi kerçekleştirilgenini tasdıqladı.
«Ukrayına telükesizlik ve mudafaa quvetleriniñ vaqtınca işğal etilgen topraqlarda, hususan Ukrayınağa ait Qırımda arbiy obyektlerge qarşı planlaştırılğan iş devam ete. Tezden tafsilâtlar Baş ştab tarafından aydınlatılacaq», – dep tarif etti Yusov Ukrayına umummilliy telemarafonında.
Onıñ qayd etkenine köre, soñki künleri Qırımdan pek çoq haber kele.
«Episi aynı tedbirlerden. Bu tedbirlerniñ neticeleri bar, inanıñız», – dep qoştı Ukrayına Mudafaa nazirligi Baş istihbarat idaresiniñ vekili.
Sentâbrniñ 20-nde Aqyar ve Qırımnıñ şimaliy-ğarbinde Aqmeçit qasabasınıñ sakinleri küçlü patlavlar aqqında haber ete.
«Krımskiy veter» Telegram kanalı Aqmeçit rayonında raketalar, Aqyarnıñ Cenübiy körfezinde tuman aqqında haber ete. «ÇP Sevastopol» ve diger Telegram kanalları Aqyarnıñ Belbek arbiy uçaq alanı ve Şimaliy tarafında patlavlar aqqında bildirdiler.
Rusiye kontrolindeki Aqyar yolbaşçısı Mihail Razvojayev «Duvanköy (Verhnesadovoye) ve Kaçada ava mudafaa sistemasınıñ işi aqqında bildirdi, ilk malümatqa köre, uçucısızlar urıp tüşürildi». Bu malümatnı mustaqil menbalarda tasdıqlamaq imkânsız ola.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
