Ukrayına Qırımnı işğalden azat etmege yardım etecek 2024 senesiniñ azırlığını yapa, dep bildirdi Ukrayına mudafaa naziri Rustem Umerov Ukrayına telemarafonınıñ yayınında.
«Bütün dünyağa muvafaqiyet qazanğanımıznı kösterdik. O qadar küçlü flotumız olmasa da, Rusiyeni vaqtınca işğal etilgen Qırımdan çekilmege mecbur ettik. 2024 senesine yapqan azırlığımız Qırımdan bütünley çekilmeleri içün yahşı imkânlar berecek», – dedi Umerov.
Yazda Ukrayına Mudafaa nazirligi Baş istihbarat idaresiniñ yolbaşçısı Kırılo Budanov Qırım.Aqiqatqa intervyü berip, Qırımnı işğalden qurtaruv kününen bağlı tahminleri aqqında tarif etti.
«E, cedvelden çıqtıq. Ne yazıq ki, esaplarımızğa köre daa yavaş inkişaf bar olğanını tanımaq kerek. Amma Qırımğa ve yarımadada olğan uruş areketleriniñ seviyesine baqsaq, 2022 senesinen qıyaslaycaq şey olmağanını añlarsıñız, 2014 senesinden 2022 senesine qadar vaqıtnı aytmayım bile. Yani ğayemizge doğru ketemiz. İstegenimizden daa yavaş, beklegenimizden daa yavaş, amma ketemiz», – dedi Budanov.
Avgust ayında Ukrayına Mudafaa nazirligi Baş istihbarat idaresiniñ yolbaşçısı Kırılo Budanov Qırım.Aqiqatqa bergen intervyüsında Qırımnı işğalden qurtarmaq içün çeşit variantlar bar, amma «cenksiz, uruş areketlersiz bunı yapmaq imkânsız», dep ayttı.
Avgustnıñ 28-nde Ukrayına prezidenti Volodımır Zelenskıy Ukrayına Silâlı quvetleri Qırım sıñırlarına çıqqanda yarımadanıñ siyasiy yolnen azat etilüvi aqqında aytmağa mümkün olur, dep bildirdi.
Ukrayına milliy telükesizligi ve mudafaa şurasınıñ kâtibi Oleksiy Danılovnıñ fikirince, Ukrayına Qırım yarımadasını azat etmege niyetlene ve bunı, büyük ihtimalnen, cenk yolunen yapacaq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
