Ukrayina prezidenti Volodımır Zelenskıy The Wall Street Journal-ğa intervyü berir eken, Ukrayina topraqlarını Rusiye arbiylerinden azat etmek içün qarşı ücümge azır, dep bildirdi.
Zelenskıynıñ sözlerine köre, Ukrayina ordusı "beklegen bütün silânı almadı, amma artıq beklemek mümkün degil". Zelenskıy, operatsiya uzun müddet devam ete ve büyük ğayıplar ketire bilir", dep tenbiledi.
"Bunı becere bilecegimizge inanamız. Ne qadar vaqıt devam etecegini bilmeyim. Doğrusını aytqanda, bütünley başqa şekilde kete bilir. Amma biz bunı yapacaqmız ve biz azırmız", - dep bildirdi devlet başı.
Ukrayina akimiyeti, Rusiye ile cenk yalıñız Rusiye ordusınıñ işğal altındaki bütün topraqlardan çekilmesinden ve Ukrayinanıñ suvereniteti halqara seviyede tanılğan sıñırlarında, yani Qırım ile beraber ğayrıdan tiklenilgeninden soñ soñuna kele bilecegini defalarca bildirgen edi.
2023 senesi aprel ayında Ukrayina Prezidenti ofisiniñ reberiniñ muavini Andriy Sıbiga Kıyiv topraq uzlaşuvlarına ketmeycek, Rusiye ile Qırım mevzusında muzakereler ise yalıñız yarımadanıñ keri qaytarılması içün mümkün varianttır, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
