Ukrayina Türkiyeniñ Qara deñizde vatandaş gemilerine, ticaret limanlarına ve energetik infrastrukturasına ücümlerge qarşılıqlı moratoriy aqqında teşebbüsine qol tutmağa azır. Bu aqta Armannıñ 24-nde Türkiyedeki Ukrayina elçisi Nariman Celâl Ankarada Ukrayina Mustaqilliginiñ 35 yıllığına bağışlanğan matbuat brifinginde bildirdi, dep haber ete "Ukrınform" milliy haber agentligi.
"Ukrayina, Qara deñizde vatandaş gemilerine, ticaret limanlarına ve energetik infrastrukturağa ücümlerge qarşılıqlı moratoriy tayin etken Türkiyeniñ teşebbüsine qol tutmağa azır... Qara deñiz cenk alanı degil de, barışıq, ticaret ve işbirlik deñizi olmalı", — dedi Celâl.
Elçi qayd etti ki, Ukrayina grajdan navigasiyasınıñ serbestligini destekley ve vaqialarnıñ allarını aydınlatmaq ve grajdan deñiz naqliyetiniñ havfsızlığını teminlemek içün Türkiye ile işbirlik yapmağa azır. O, em de gemi saiplerini ve ekipajlarnı arbiy havflarnı köz ögüne almağa ve navigasiya aqqında haberdarlıqlarğa riayet etmege çağırdı.
Ukrayina tarafınıñ malümatına köre, tam kölemli ücüm başlanğanından berli Rusiye eñ azdan 1054 Ukrayin liman infrastrukturası obyektlerine zarar ketirdi ya da yoq etti. 232 tınç gemige ücümler qayd etildi, olardan 30-dan ziyadesi tek 2026 senesi yazda oldı. Bu ücümler neticesinde Ukrayina ve diger memleketlerniñ 307 vatandaşı elâk oldı ya da yaralandı.
Armannıñ başında Türkiye Ukrayina ve Rusiyeni Qara deñizde gemilerge qarşı ateş açılmasına moratoriy qoymağa çağırdı ve ücümlerniñ sayısı artqanı içün Qara deñizge doğru ticaret gemileriniñ areketini sıñırladı.