Ukrayina Qırımdan vazgeçse, o, Rusiye ile qarşılıqta yutquzacaq. Bu aqta Qırımtatar Milliy Meclisi reisiniñ muavini Nariman Celâl "Karpyak" leyhasına bergen intervyüsında tarif etti.
"Ukrayina Qırımdan vazgeçmege aqılda razı olsa bile, o, yutquzacaq. Rusiye, Qırım Ukrayina devletiniñ bütünligi, havfsızlığı ve serbestligini temin etmek içün ne qadar müim olğanını pek yahşı añlay", — dep bildirdi Celâl.
O, şunı da qoştı ki, Qırımsız "Ukrayina ğayrıdan tiklenmez ve tolu olamaz". Bundan ğayrı, Celâl qayd etti ki, Qırımda özüni Ukrayina vatandaşları olaraq tanıp, Ukrayinağa sadıq qalğan ve Rusiye tarafından basqı, repressiyalar ve qorquzuvlar altında bulunğan insanlar qala.
Celâl şunı da bildirdi ki, Avropada istiqrar Ukrayina topraq bütünligine bağlı ve Avropadaki ortaqlarnıñ çoqusı bunı añlay.
"Bizler añlamaq kerekmiz ki, Qırımnı Rusiyege berüvnen mesele çezilmeycek. Qıtay teklif etkeni kibi, ya da Braziliya teklif etkeni kibi... Avropa memleketleri ya da Amerika Birleşken Devletleri ziyaret etkende, men er vaqıt adiy bir misal ketire edim. 2022 senesine Qırımnıñ Rusiye akimiyeti altında bulunğanına sekiz yıl edi. Rusiye bu vaziyetten memn edimi? Yoq. O, bütün Ukrayinağa ücüm etip, tam bir istilâ başlattı... Ve biz köremiz ki, Avropanıñ yetekçi liderleri bunı añlaylar ve bunı açıqtan aytalar. Trampnıñ bildirgenine baqmadan, Avropa bugün keç olsa da, "yoq, biz vaziyetni böyle qaldırıp olamaymız, biz Ukrayinağa topraq bütünligini ğayrıdan tiklemege yardım etmek kerekmiz" — dep ayta, dedi Celâl.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
