Qırım ilhaqınıñ başından berli Ukrayina uquq qoruyıcı organları yarımadada qanunsız tutuluv ve tintüvler boyunca 300-den ziyade cinaiy davanı tahqiq etti. Bu aqta Qırım Muhtar Cumhuriyetiniñ prokuraturasına atıf etip, "Suspilne" haber ete.
Müessiseniñ malümatına köre, yaqalanğan ve tintüv keçirilgenlerniñ çoqusı qırımtatarlardır.
Rusiye quvetçileriniñ areketleri Ukrayina Ceza kodeksiniñ 146 (qanunsız azatlıqtan marum etüv) ve 162 (qanunsız tintüv) maddeleri boyunca belgilene.
Bundan da ğayrı, ukrayin uquq qoruyıcıları qırımlılarnıñ qanunsız apis etilmesi ile bağlı Ukrayina Ceza kodeksiniñ 438-inci maddesine istinaden (cenk qanunları ve adetlerini bozuv) 112 dava açtılar.
Al-azırda Rusiye uquq qoruyıcı organlarınıñ vekillerine qarşı beş qabaatlav aktı ve Rusiye kontrolindeki makemeciler, prokurorlar ve qırımlılarnıñ taqip etilmesinde iştirak etken diger memurlarğa qarşı 13 akt yollanıldı.
Muhtariyetniñ prokuraturası, Rusiye halqara gumanitar uquqnı, şu cümleden RF ordusında hızmet etmege mecbur etüvni yasaq etken Jeneva konventsiyasınıñ 51-inci maddesini muntazam sürette boza, dep qayd ete.
2014 senesinden başlap Qırımda Rusiye Silâlı quvetleriniñ saflarına mecburen ya da basqı altında 34 biñden ziyade vatandaş celp etildi.
"İşğalci devlet repressiyalarnı qorquzuv aleti olaraq qullana. Er bir faktnı qayd etemiz ve Ukrayina vatandaşlarına qarşı cinayetlerde iştirak etkenlerniñ mesuliyetke çekilmesi içün çalışamız", — dep aytıla haberde.
Bundan evel Qırım Muhtar Cumhuriyetiniñ prokuraturası bölüginiñ yolbaşçısı Yegor Rebrov Qırım.Aqiqat Radiosınıñ efirinde bildirdi ki, 2024 senesi Qırım prokuraturasınıñ taqiqat materialları boyunca qırımlılarnı arbiy cinayetlerde ve Ukrayinanıñ milliy havfsızlığı esaslarını bozğanında qabaatlap, 141 üküm çıqarıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
