Ukrayina Qırım Muhtar Cumhuriyetiniñ işğalini uquqiy ceetten iç bir vaqıt tanımayca, dep bildirdi çeçek ayınıñ 22-nde prezident Volodımır Zelenskıy Kıyivde jurnalistlerniñ suallerine cevap bergen zaman.
"Ukrayina alâ daa topraqlarnı deñişüv ya da red etüv aqqında resmiy teklifler almadı... Qırımnı muzakere etmey bilemiz... Ukrayina Qırım işğalini uquqiy ceetten iç bir vaqıt tanımaycaq", — dedi devlet yolbaşçısı.
Amerika kütleviy haber vastaları, şu cümleden Wall Street Journal gazetası, Vaşingtonnıñ Kıyivge cenkni yekünlemek içün teklifler bergenini bildirgen edi, olarnıñ arasında ABD tarafından Qırım ilhaqınıñ tanılması ve Ukrayinanıñ NATO-ğa kirmesiniñ red etilmesi bar.
"The Wall Street Journal" neşiriniñ menbalarına köre, plannıñ daa bir ğayesi Zaporojjâ atom stantsiyası etrafındaki topraqnı tarafsız olaraq ilân etmekten ibaret, o, ABD nezareti altında qala bile. ZAES 2022 senesi saban ayında Rusiye ordusı tarafından zapt etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
