Ukrayina Tış işler nazirligi Rusiye prezidenti Vladimir Putinniñ Ukrayinada BM imayesi altında saylavlarnı keçirmek içün vaqtınca iqtidar quruv beyanatına cevap berdi.
«Qarşı teklif: Rusiyede BM vaqtınca idaresi, Vorkutadan başlap. Yerli sakinler Ukrayinağa qarşı cinaiy cenkine milliardlarnen dollar sarf etken Putinden ğayrı er angi idareden daa çoq fayda körer edi, ğaliba», – dep yazdı Ukrayina Tış işler nazirliginiñ vekili Ğeorgiy Tıhıy X içtimaiy ağında.
Rusiye prezidenti Vladimir Putin martnıñ 27-nde Ukrayinada «vaqtınca tış halqara idareni» kirsetüv ğayesini muzakere etmege teklif etti.
Putin Rusiyeniñ Şimaliy flotunı ziyaret etkende aytqanına köre, bu Ukrayinada «demokratik saylavlar» keçirmek ve barışıq muzakereleriniñ keçirilmesi mümkün olğan «halqnıñ işançını qazanğan ükümetni akimiyetke ketirmek» içün kerek ola bile. Onıñ aytqanına köre, böyle ğayeni «BM, ABD, Avropa memleketlerinen» ve Rusiyeniñ «ortaqları ve dostlarınen» ömürge keçirmek mümkün.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
